Xəstəlik hansı xəstəliyi üzə çıxarır?
Dünya Bankı koronavirus pandemiyasının yaratdığı iqtisadi risklərlə mübarizə hesabatı yayıb. Hesabatda Avropa və Mərkəzi Asiya ölkələrinin virusdan öncəki və indiki iqtisadi durumu analiz edilir.
Novator.az-ın məlumatına görə, iqtisadçı Rövşən Ağayev yazır ki, hesabatın Azərbaycanla bağlı bölümündə ümumi daxili məhsulun 100 faizi ətrafında valyuta ehtiyatının olması, aşağı xarici borc ölkənin əsas üstünlüyü kimi göstərilir: “Lakin neftin qiymətinin uzun müddət aşağı qalmasının, ixrac gəlirlərinin, turizmdən valyuta axınının zəifləməsinin, pandemiyanın təsirlərinin azaldılması üçün maliyyə ehtiyaclarının artmasının ciddi iqtisadi risklər yaratdığı vurğulanır.
Bank ekspertləri hesab edir ki, virusun yaratdığı böhranın ən ağır zərbəsi çox kasıb 40 faizlik ev təsərrüfatlarına dəyəcək. Azərbaycanda 2,5 milyona yaxın ev təsərrüfatının olduğunu nəzərə alsaq, deməli, indilikdə böhranın risk zonasında olan ən azı 1 milyon ev təsərrüfatından söhbət gedir.
Hesabatda Azərbaycanla bağlı ən maraqlı detallardan biri məzənnənin inflyasiya ötürücülüyü ilə bağlı hesablanmasıdır. Sənəd müəlliflərinə görə, Azərbaycan iqtisadiyyatı məzənnənin inflyasiya ötürücülüyünə son dərəcə həssasdır. Ölkənin bu sarıdan müqayisə olunduğu Macarıstan, Polşa, Türkiyə və Rusiyanı geridə qoyduğu bildirilir.
Məzənnənin inflyasiya ötürücülüyü əmsalı milli valyutanın 1 faizlik ucuzlaşmasının istehlak qiymətləri indeksində yaratdığı artımı göstərir. Hesabat müəllifləri Azərbaycanda bu əmsalın 0,25-ə bərabər olduğunu göstərir. Bu əmsal nə qədər yüksəkdirsə, deməli, idxaldan o qədər asılısan. Əmsaldan çıxış etsək, Azərbaycanın idxaldan asılılıq səviyyəsi Rusiya ilə müqayisədə azı 2, Türkiyə ilə müqayisədə 4 dəfə yüksəkdir. Bu əmsala baxdıqda hökumətin hazırkı gərgin virus dövründə məzənnə məsələsində niyə bu qədər həssas olduğu aydın görünür”.
2019-cu ilin dekabrında Çində üzə çıxan, pnevmoniyanın yeni növü olan yoluxucu koronavirus xəstəliyi 210 ölkə və əraziyə yayılıb, 95 mindən çox şəxs dünyasını dəyişib.
Ölkələr infeksiyanın yayılmasının qarşısını almaq məqsədilə sərhədləri və bir çox iş yerini qapadıb, iqtisadi fəallıq aşağı düşüb.
