Qiymətlər, razılaşmalar
AZƏRTAC-ın 10 aprel məlumatına görə, London birjasında brent markalı neftin barreli 31,48 dollara, Nyu-York birjasında layt markalı neftin barreli 22,76 dollara təklif olunur.
“AzəriLayt” markalı Azərbaycan neftinin barrelinə 25,31 dollar qiymət qoyulduğu vurğulanır.
Azərbaycanın 2020-ci il büdcəsində neftin qiyməti 55 dollardan götürülüb. “AzəriLayt” yanvara 70,04, fevrala 62,15, marta 53,77, aprelə 19,43 dollarla başlayıb.
Mart ayından başlayaraq neft dünyanı bürüyən koronavirus xəstəliyi fonunda kəskin ucuzlaşıb.
Novator.az-ın məlumatına görə, OPEK ölkələri (Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və bir neçə qeyri-OPEK ölkəsi (Azərbaycan, Qazaxıstan, Rusiya və s.) aprelin 9-da gündəlik hasilatı mərhələlərlə azaltmaq razılığına gəliblər. May-iyun aylarında hasilat 2018-ci ilin oktyabr ayı səviyyəsindən 10 milyon barrel həcmində azaldılacaq. Azərbaycan gündəlik neft hasilatını 554 min barrel həcmində saxlamalıdır.
İyul-dekabr aylarında gündəlik neft hasilatının 2018-ci ilin oktyabr ayı səviyyəsindən 8 milyon barrel azaldılması planlaşdırılır. Həmin dövrdə Azərbaycanın gündəlik hasilatı 587 min barrel səviyyəsində olmalıdır.
2021-ci ilin yanvar ayından 2022-ci ilin aprelinədək isə gündəlik neft hasilatının 2018-ci ilin oktyabr ayı səviyyəsindən 6 milyon barrel azaldılması nəzərdə tutulur. Azərbaycan həmin dövrdə hasilatı 620 min barrel həcmində saxlamağa razılıq verib.
