Köşklər bağlıdır. Bəs qəzetlər?
Martın 20-dən 28-dək Novruz tətilində olan qəzetlər bayramdan sonra problemlə üzləşib. Ölkədə xüsusi karantin rejimi tətbiq olunduğu üçün martın 29-dan əksər ticarət obyektləri, o cümlədən qəzet köşkləri qapadılıb.
Novator.az bildirir ki, Milli Məclisin orqanı olan gündəlik “Azərbaycan” qəzeti buna görə martın 30-dan çapına ara verib. Aprelin 8-dən qəzet yenidən nəşr olunur və abunə vasitəsilə yayılır.
Təsisçilərindən biri Prezidentin İşlər İdarəsi olan gündəlik nəşrlər – “Xalq qəzeti”, “Respublika” və “Bakinski raboçi” qəzetləri də eyni sistem üzrə çıxırlar.
Bəzi gündəlik və günaşırı nəşrlərin – “Bakı xəbər”, “Səs”, “Yeni Azərbaycan”, “Ədalət”, “525-ci qəzet”, “Həftə içi”, “Xalq Cəbhəsi”, “İki sahil”, “Kaspi”, “Kaspiy”, “Şərq” qəzetlərinin də çap olunaraq abunə vasitəsilə yayıldığı bilinir.
Populyar qəzetlərdən “Yeni Müsavat” və idman nəşri “Futbol+” isə köşklər qapalı olduğundan çapı bərpa etməyə hələlik ehtiyac görmürlər.
