Elman Rüstəmov qalır
Milli Məclis aprelin 9-da keçirilən plenar iclasında prezident İlham Əliyevin təqdimatına baxaraq Elman Rüstəmovu yenidən Mərkəzi Bankın İdarə Heyətinin üzvü təyin edib.
Azərbaycan Konstitusiyasına görə, Mərkəzi Bankın İdarə Heyəti üzvlərinin vəzifəyə təyin və vəzifədən azad edilməsi parlamentin, İdarə Heyəti üzvləri sırasından Mərkəzi Bankın sədrini seçmək dövlət başçısının səlahiyyətindədir.
Elman Rüstəmov hazırda Mərkəzi Bankın (2009-cu ilədək Milli Bank adlanıb) sədridir.
Novator.az bildirir ki, Elman Rüstəmov 1952-ci ildə Cəbrayıl rayonunda doğulub. Azərbaycan Xalq Təsərrüfatı İnstitutunu (indiki Dövlət İqtisad Universiteti) bitirib, həmçinin aspirantura və doktorantura təhsilləri alıb. İqtisad elmləri doktorudur.
Azərbaycan Dövlət Plan Komitəsi yanında Elmi-Tədqiqat İqtisadiyyat İnstitutunda iqtisadçısı, böyük iqtisadçı, bölmə müdiri vəzifələrində çalışıb, Azərbaycan Yüngül Sənaye Nazirliyinin Bakı Zərif-Mahud İstehsalat Birliyində iqtisadiyyat idarəsinin rəisi olub, Prezident Aparatında böyük məsləhətçi postu tutub.
1992-ci ildə Milli Bankın İdarə Heyəti sədrinin birinci müavini vəzifəsinə təyinat alan Elman Rüstəmov 1995-ci ildən sədr postundadır.
“Şöhrət” ordeni və 1-ci dərəcəli “Vətənə xidmətə görə” ordeni laureatıdır.
