8 ölüm, 717 yoluxma. Operativ qərargahın yeni məlumatı
Aprelin 7-də Nazirlər Kabineti yanında operativ qərargah növbəti məlumat yayıb.
Məlumatda deyilir ki, ölkədə daha 76 nəfərin koronavirus infeksiyasına yoluxduğu qeydə alınıb, 1953-cü il təvəllüdlü, şəkərli diabet xəstəsi olan bir nəfər vəfat edib.
Ümumilikdə ölkədə 717 nəfərin koronavirus infeksiyasına yoluxduğu müəyyən edilib, onlardan 44 nəfəri müalicə olunaraq sağalıb, 8 nəfər vəfat edib, 665 nəfərin xüsusi rejimli xəstəxanalarda müalicəsi davam etdirilir. Həmin şəxslərdən 23 nəfərin vəziyyəti ağır, 31 nəfərin vəziyyəti orta ağır qiymətləndirilir, digərlərinin səhhəti stabildir.
Aprelin 7-də sərəncam imzalayan prezident İlham Əliyev koronavirusa yoluxmuş xəstələrin müalicəsi üçün hər birində 200 çarpayı olan modul tipli 6 xəstəxananın quraşdırılmasına 2020-ci ilin dövlət büdcəsindən 14,8 milyon manat ayırıb.
Hazırda koronavirus xəstələri 20-dən çox xəstəxanada müalicə alırlar.
2019-cu ilin dekabrında Çində üzə çıxan, pnevmoniyanın yeni növü olan yoluxucu koronavirus xəstəliyi 210-a yaxın ölkə və əraziyə yayılıb, 76 mindən çox şəxs dünyasını dəyişib.
Azərbaycanda infeksiyanın yayılmasının qarşısını almaq məqsədilə sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, ticarət məkanları (supermarketlər, ərzaq mağazaları və apteklər istisna olmaqla), bir çox məişət xidməti yerləri bağlanıb, toy və şənlik məclisləri, dəfn istisna olmaqla yas mərasimlərinin keçirilməsi qadağan olunub, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.
