Rusiya: tibbi məmulatların satışında yenilik tətbiq olundu
Rusiya hökuməti tibbi məmulatların bəzi növlərinin topdan və pərakəndə satışına məhdudiyyət tətbiq edir. Novator.az-ın məlumatına görə, Nazirlər Kabineti məhdudiyyət nəzərdə tutulan tibbi ləvazimatlar siyahısına filtrləyici respiratorları, tibbi maskaları, əlcəkləri, cunanı, birdəfəlik tibbi dəstləri, qoruyucu geyimi və ilk tibbi yardım dəstlərini daxil edib.
Hökumət sərəncamı həmin malların dövriyyəsi qaydasını müəyyənləşdirir: əhalinin ehtiyaclarının ödənməsi üzrə federal əlaqələndirici kimi “Rusiya kimyəvi müdafiə” korporasiyası seçilib və bu qurum topdansatışa cavabdeh olacaq.
Yeniliyə görə, faktiki satış qiymətlərinə əlavə olunan topdansatış məbləğinin həcmi alış qiymətinin və ya malların dəyərinin on faizindən çox olmamalıdır.
Yalnız əczaçılıq fəaliyyəti və dərman ticarəti üçün lisenziyası olan ixtisaslaşmış təşkilatlar bu məhsulları ala və pərakəndə satışını həyata keçirə bilər.
Səidə Hüseynova
