Neftsiz ixracın liderləri
İqtisadi İslahatların Təhlili və Kommunikasiya Mərkəzi yeni ixrac icmalı yayıb. Hesabata görə, 2020-ci ilin yanvar-fevral aylarında Azərbaycanın ixracı 2019-cu ilin ilk iki ayına nisbətən 3,1 faiz artaraq 3,2 milyard ABŞ dollarına çatıb: “Qeyri-neft sektoru üzrə 296 milyon ABŞ dolları dəyərində ixrac reallaşdırılıb. Bu, 2019-cu ilin yanvar-fevral ayları ilə müqayisədə 5 faiz çoxdur. İki ayda Rusiyaya 88 milyon, Türkiyəyə 75,3 milyon, Gürcüstana 34,9 milyon, İsveçrəyə 28,8 milyon, Çinə 7,6 milyon ABŞ dolları dəyərində qeyri-neft sektoruna aid mal ixrac olunub.
İxrac edilən qeyri-neft sektoruna aid malların siyahısında pambıq mahlıcı birinci (29,2 milyon ABŞ dolları), sikkə kəsilməsində istifadə olunmayan, digər emal olunmamış formalarda qızıl ikinci (27,3 milyon ABŞ dolları), pomidor üçüncü (24,7 milyon ABŞ dolları) sırada qərar tutub”.
İqtisadi İslahatların Təhlili və Kommunikasiya Mərkəzi 2016-cı ildə yaradılıb. Nizamnaməsinə görə, mərkəzin əsas missiyası təhlil və tədqiqatlar aparmaqla iqtisadi islahatların həyata keçirilməsi üçün təkliflər, habelə orta və uzun müddətli dövr üçün proqnozlar hazırlamaq, dövlət orqanlarını və qurumlarını həmin proqnozlarla təmin etməkdir.
Qurumun icraçı direktoru postunu Vüsal Qasımlı tutur.
