Sosial təminat hesabatı
2020-ci il yanvarın 1-nə Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunda 1 milyon 270,6 min nəfər pensiyaçı qeydiyyatda olub. Novator.az-ın məlumatına görə, Dövlət Statistika Komitəsi bildirir ki, onların 58,4 faizi yaşa, 30,2 faizi əlilliyə, 11,4 faizi ailə başçısını itirməyə görə pensiya alıb: “Təyin olunmuş aylıq pensiyaların orta məbləği ötən ilin müvafiq dövrü ilə müqayisədə 19,1 faiz artaraq 263,6 manata çatıb”.
Rəsmi hesabata əsasən, yanvarın 1-nə 401,2 min nəfərə aylıq sosial müavinətlər təyin olunub, 72647 ailə 76204 uşağın anadan olmasına görə, radiasiya qəzası nəticəsində zərər çəkmiş 4273 şəxs müalicə üçün və penitensiar müəssisələrdə cəza çəkməkdən azad edilmiş 6387 nəfər birdəfəlik müavinətlər, 72,2 min aztəminatlı ailənin 298,9 min üzvü ünvanlı dövlət sosial yardımı alıb, müxtəlif kateqoriyadan olan 293,8 min şəxsə prezident təqaüdü verilib.
