Övladlığa götürmə statistikası
Ədliyyə Nazirliyinin hesabatına əsasən, 2019-cu ildə 345 nəfəri oğlan, 315 nəfəri qız olmaqla ümumilikdə 660 uşaq övladlığa götürülüb. Əcnəbilər və vətəndaşlığı olmayan şəxslərə 8-i qız olmaqla 14 uşaq verilib: “Övladlığa götürülmüş uşaqların 175 nəfəri 1 yaşadək, 296 nəfəri 1-5 yaş, 115 nəfəri 6-10 yaş, 74 nəfəri 11-17 yaş arasında olub”.
Məhkəmələrin övladlığa götürülmənin ləğvini nəzərdə tutan 82 qərar çıxardığı bildirilir.
Bu il fevralın 27-də fərman imzalayan prezident İlham Əliyev valideyn himayəsindən məhrum olmuş uşaqların övladlığa götürülməsi, o cümlədən Azərbaycan vətəndaşı olan uşaqları əcnəbilər və vətəndaşlığı olmayan şəxslərin övladlığa götürməsi qaydasını təsdiqləyib.
Novator.az bildirir ki, qaydaya görə, valideyn himayəsindən məhrum olmuş və övladlığa götürülən uşaqların, habelə onları övladlığa götürməyi arzu edən şəxslərin vahid uçotunun elektron qaydada aparılması, valideyn-namizədlə müsahibə keçirilməsi, onun maddi-məişət şəraitinin müayinəsi, valideyn-namizəd üçün təlimin təşkili, valideyn-namizədə uyğun uşağın və övladlığa götürülən uşağa uyğun valideynin seçilməsi, valideyn-namizədlə uşaqların yerləşdiyi müəssisələrdə görüşlərin təşkili, övladlığa götürülən uşaqların sınaq müddətində valideyn-namizədin evində yerləşdirilməsi, övladlığagötürmənin əsaslandırılması və övladlığa götürülən uşağın mənafeyinə uyğunluğu haqqında rəy verilməsi, övladlığagötürmədən sonrakı monitorinqlərin aparılması, eləcə də övladlığagötürmənin ləğvinin tələb edilməsi Əmək və Əhalinin Sosial Müdafiəsi Nazirliyinin səlahiyyətindədir.
