Parlamentin işində yeni qayda
Parlamentin 30 mart iclasında Milli Məclisin daxili nizamnaməsinə dəyişiklik edilib. 2020-ci il dekabrın 30-dək qüvvədə olacaq yeniliyə görə, parlament sədri karantin tətbiqi, sanitar-epidemioloji və bu kimi digər tədbirlərlə əlaqədar Milli Məclisin, həmçinin komitələrin və komissiyaların iclaslarının müəyyən dövr üçün real vaxt rejimində internet vasitəsilə keçirilməsinə sərəncam verə bilər. Bunun üçün 42 deputatın tələbi gərəkdir. Real vaxt rejimində keçirilən iclaslarda səsvermə deputatların gücləndirilmiş elektron imzaları vasitəsilə həyata keçirilir.
Deputatın statusunu tənzimləyən qanun da yenilənib. Dəyişikliyə əsasən, epidemiya əleyhinə rejimin, sanitariya-gigiyena və karantin rejimlərinin tətbiqi ilə əlaqədar məhdudlaşdırıcı tədbirlər Milli Məclisin deputatlarına şamil edilmir.
2019-cu ilin dekabrında Çində pnevmoniyanın yeni növü olan yoluxucu koronavirus xəstəliyi üzə çıxaraq 200-ə yaxın ölkə və əraziyə yayılıb, 34 mindən çox şəxs dünyasını dəyişib.
Azərbaycanda ümumilikdə 273 nəfərin koronavirus infeksiyasına yoluxduğu bilinib, onların 26-sı sağalıb, 4-ü vəfat edib, 243-ü müalicə alır.
Azərbaycanda infeksiyanın yayılmasının qarşısını almaq məqsədilə sərhədlər qapadılıb, təhsil müəssisələri bağlanıb, kütləvi tədbirlər təxirə salınıb, kinoteatrların, muzey və teatrların, əyləncə mərkəzlərinin, idman zallarının, ictimai iaşə müəssisələrinin fəaliyyəti dayandırılıb, toy məclisləri, dəfn istisna olmaqla yas mərasimlərinin keçirilməsi qadağan olunub, ölkə ərazisində gediş-gəliş, ictimai nəqliyyatın hərəkəti məhdudlaşdırılıb, 65 yaşdan yuxarı insanların evdən çıxması, ictimai yerlərdə, o cümlədən küçələrdə, bulvarlarda, parklarda və digər yerlərdə vətəndaşların 10 nəfərdən artıq qruplarda cəmləşməsi yasaqlanıb.
