Prezidentdən mühafizə fərmanı
Prezident İlham Əliyev Xüsusi Dövlət Mühafizə Xidmətinin ləğvinə fərman verib. Martın 16-da imzalanan sənədə görə, Xüsusi Dövlət Mühafizə Xidmətinin əsasında üç qurum yaradılır: Prezidentin Təhlükəsizlik Xidməti; Xüsusi Rabitə və İnformasiya Təhlükəsizliyi Dövlət Xidməti; Strateji Obyektlərin Mühafizəsi Dövlət Agentliyi.
Hər üç təsisat əsasnamələrinin, strukturlarının və ali zabit heyəti vəzifələrinin siyahılarının layihələrini, habelə hərbi qulluqçuları və işçilərinin say həddi barədə təkliflərini 2 ay müddətində prezidentə təqdim etməlidir. Nazirlər Kabinetinə həmin müddət ərzində “Milli Qvardiyanın statusu haqqında” qanun layihəsini hazırlamaq tapşırılıb.
Martın 16-da həmçinin sərəncam imzalayan dövlət başçısı Bəylər Eyyubovu Prezidentin Təhlükəsizlik Xidmətinin rəisi təyin edib. General-polkovnik Bəylər Eyyubov Xüsusi Dövlət Mühafizə Xidməti rəisinin birinci müavini idi.
Novator.az bildirir ki, Xüsusi Dövlət Mühafizə Xidmətinin əsası 1931-ci ildə Xalq Daxili İşlər Komissarlığının Mühafizə Şöbəsi kimi qoyulub. 1938-ci ildən qurum Bakı Şəhər İcraiyyə Komitəsinin Daxili İşlər İdarəsinin 2-ci Divizionu, 1972-ci ildən Daxili İşlər Nazirliyinin Partiya-Sovet Orqanlarının Mühafizə Şöbəsi adlanıb.
1991-ci ildə qurum Prezident Aparatı yanında Mühafizə İdarəsinə, sonra Daxili İşlər Nazirliyi yanında Ali Dövlət Hakimiyyət və İdarəetmə Orqanlarını Mühafizə Şöbəsinə, 1992-ci ildə Ali Dövlət Hakimiyyət və İdarəetmə Orqanlarını Mühafizə İdarəsinə çevrilib.
23 avqust 1993-cü ildə Ali Dövlət Hakimiyyət və İdarəetmə Orqanlarını Baş Mühafizə İdarəsi yaradılıb, 2002-ci ildə quruma Xüsusi Dövlət Mühafizə Xidməti adı verilib.
Quruma 1992-ci ildən bəri Vaqif Axundov rəislik edib. 1950-ci il təvəllüdlü Vaqif Axundov general-polkovnikdir.
