Parlament tibbi rejimin pozulması cəzalarına səs verdi
Milli Məclisin 17 mart iclasında Cinayət Məcəlləsinə 139-1-ci maddə əlavə edilib. Novator.az bildirir ki, yeniliyə görə, epidemiya əleyhinə rejimin, sanitariya-gigiyena və ya karantin rejimlərinin pozulması xəstəliklərin yayılmasına səbəb olduqda və ya xəstəliklərin yayılması üçün real təhlükə yaratdıqda 2500 manatdan 5000 manatadək miqdarda cərimə və ya 3 ilədək müddətə azadlığın məhdudlaşdırılması və ya 3 ilədək müddətə azadlıqdan məhrumetmə ilə cəzalandırılacaq.
Eyni əməllər insan ölümünə və ya digər ağır nəticələrə səbəb olduqda 3 ildən 5 ilədək müddətə azadlığın məhdudlaşdırılması və ya 3 ildən 5 ilədək müddətə azadlıqdan məhrumetmə cəzası veriləcək.
Parlament həmçinin İnzibati Xətalar Məcəlləsində 211-ci maddəni yeniləyib. Dəyişikliyə əsasən, epidemiya əleyhinə rejimin, sanitariya-gigiyena və karantin rejimlərinin pozulmasına görə fiziki şəxslər 100 manatdan 200 manatadək məbləğdə, vəzifəli şəxslər 1500 manatdan 2000 manatadək məbləğdə cərimə ediləcək, yaxud işin hallarına görə xətanı törədənin şəxsiyyəti nəzərə alınmaqla 1 ayadək müddətə inzibati həbs tətbiq olunacaq, hüquqi şəxslər 2000 manatdan 5000 manatadək məbləğdə cərimə ediləcək.
Ötən ilin dekabrında Çində pnevmoniyanın bir növü olan koronavirus xəstəliyi üzə çıxıb. 162 ölkədə yayılan xəstəlikdən 7100 nəfərdən çox şəxs dünyasını dəyişib.
Azərbaycanda 28 nəfərin koronavirus infeksiyasına yoluxduğu bilinib, onların 6-sı sağalıb, 1-i vəfat edib.
