Yeni rəsmi hesabatlar
2020-ci ilin yanvar-fevral aylarında pərakəndə ticarət şəbəkəsində əhaliyə 2 milyard 994,7 milyon manatlıq ərzaq məhsulları, içkilər və tütün məmulatları, 2 milyard 864 milyon manatlıq qeyri-ərzaq məhsulları satılıb. Novator.az-ın məlumatına görə, Dövlət Statistika Komitəsi bildirir ki, 2019-cu ilin eyni dövrü ilə müqayisədə ümumi ticarət dövriyyəsi 3,1 faiz artıb.
Alıcıların son istehlak məqsədilə aldıqları mallara xərclədiyi vəsaitin 45,1 faizinin ərzaq məhsullarının, 6 faizinin içkilər və tütün məmulatlarının alınmasına sərf olunduğu bildirilir, əhalinin bir nəfərinə düşən orta aylıq pərakəndə ticarət dövriyyəsi 294,3 manat göstərilir.
Başqa bir hesabata əsasən, 2020-ci ilin yanvar ayında Azərbaycanın hüquqi və fiziki şəxsləri 133 ölkədəki tərəfdaşları ilə ticarət əməliyyatları həyata keçirib, 71 ölkəyə məhsul ixrac olunub, 124 ölkədən mal alınıb, ticarət dövriyyəsinin 69,6 faizi ixracın, 30,4 faizi idxalın payına düşüb.
Qeyd olunur ki, 2019-cu ilin yanvar ayı ilə müqayisədə idxal 45 faiz azalıb, ixrac 0,5 faiz artıb.
Qeyri neft-qaz məhsullarının ixracının faktiki qiymətlərlə 2,5 faiz artdığı, real ifadədə isə 5,8 faiz azalaraq 140,8 milyon dollar dəyərində qərarlaşdığı vurğulanır.
Dövlət Statistika Komitəsi həmçinin bildirir ki, 2020-ci ilin yanvar-fevral aylarında ölkənin iqtisadi və sosial sahələrinin inkişafı üçün əsas kapitala 1 milyard 965,2 milyon manat vəsait yönəldilib.
Rəsmi hesabata görə, sənaye müəssisələri və bu sahədə fəaliyyət göstərən fərdi sahibkarlar yanvar-fevral aylarında 7,7 milyard manatlıq və ya 2019-cu ilin eyni dövrü ilə müqayisədə 0,9 faiz çox sənaye məhsulu istehsal edib, sənayenin qeyri neft-qaz sektorunda məhsul istehsalı 21,7 faiz artıb.
