Miqrasiya: pozuntular, cəzalar
Dövlət Miqrasiya Xidməti 2020-ci ilin fevral ayına olan statistik məlumatları açıqlayıb. Rəsmi hesabata görə, ay ərzində əcnəbilərin və vətəndaşlığı olmayan şəxslərin olduğu yer üzrə qeydiyyatı ilə bağlı 39039 müraciət qeydə alınıb. Ölkədə müvəqqəti olma müddətinin uzadılması, müvəqqəti və daimi yaşamaq üçün icazələrin alınması, vətəndaşlığa qəbul, bərpa, vətəndaşlıqdan çıxma, eləcə də vətəndaşlıq mənsubiyyətinin və qaçqın statusunun müəyyənləşdirilməsi, əmək fəaliyyətinin həyata keçirilməsi üçün iş icazələrinin alınması və mövcud iş icazələrinin müddətinin uzadılması sahələrində 7298 müraciətin daxil olduğu bildirilir.
Qeyd olunur ki, qanunvericiliyin tələblərinin pozulması ilə əlaqədar 1208 qərar qəbul edilib: “619 qərarda inzibati cərimə tətbiqi (410-u ölkəni tərk etməni nəzərdə tutub) yer alıb. Ölkə ərazisinə girişə məhdudiyyət yönündə 527 qərar verilib.
25 qərar müvəqqəti və daimi yaşamaq üçün icazə vəsiqələrinin itirilməsi, 18-i olduğu yer üzrə qeydiyyat məsələləri ilə bağlıdır.
Əcnəbilərin və vətəndaşlığı olmayan şəxslərin işə cəlb edilməsi qaydasının pozulması istiqamətində 19 qərar çıxarılıb”.
