İlin əvvəlindən Azərbaycan nefti 33,93 dollar ucuzlaşıb
AZƏRTAC-ın 11 mart məlumatına görə, London birjasında brent markalı neftin barreli 37,76 dollara, Nyu-York birjasında layt markalı neftin barreli 34,56 dollara satılır.
“AzəriLayt” markalı Azərbaycan neftinin barrelinin 36,47 dollara təklif olunduğu vurğulanır.
Novator.az bildirir ki, Azərbaycanın 2020-ci il büdcəsində neftin qiyməti 55 dollardan götürülüb. “AzəriLayt” yanvara 70,04, fevrala 62,15, marta 53,77 dollarla başlayıb.
İlin əvvəlindən bəri Azərbaycan nefti 33,93 dollar ucuzlaşıb.
Martın 10-u Nazirlər Kabinetində qlobal enerji bazarında vəziyyət və onun iqtisadiyyata təsirinə dair məsələlər müzakirə edilib. Baş nazir Əli Əsədovun sədrlik etdiyi müşavirəyə prezidentin köməkçisi, administrasiyanın iqtisadi məsələlər və innovativ inkişaf siyasəti şöbəsinin müdiri Şahmar Mövsümov, iqtisadiyyat naziri Mikayıl Cabbarov, maliyyə naziri Samir Şərifov, Mərkəzi Bankın İdarə Heyətinin sədri Elman Rüstəmov, Dövlət Neft Fondunun icraçı direktoru İsrafil Məmmədov və baş nazirin köməkçisi Fəxri İsmayılov qatılıblar. Qeyd olunub ki, dünyada koronavirus infeksiyasının yayılmasının qlobal iqtisadiyyata mənfi təsirlərinin artdığı şəraitdə əsas neft ixracatçıları arasında hasilatın həcmi barədə fikir ayrılığının yaranması dünya bazarında neftin qiymətinin kəskin ucuzlaşmasına gətirib, Azərbaycan hökuməti baş verə biləcək neqativ iqtisadi tendensiyaların ölkə iqtisadiyyatına mənfi təsirlərinin neytrallaşdırılması üçün preventiv tədbirlər planlarına malikdir.
