Yeni Milli Məclis toplaşır
Yeni Milli Məclisin ilk iclası martın 10-da keçiriləcək. Xəbəri yayan APA bildirir ki, ən yaşlı deputat Fəttah Heydərovun aparacağı iclasda Milli Məclisin sədri və müavinləri seçiləcək.
Milli Məclisə seçki fevralın 9-da 125 dairədə keçirilib. 4 dairə üzrə səsvermənin nəticələri ləğv olunduğu üçün yeni parlament hələlik 121 nəfərdən ibarətdir.
Prezident İlham Əliyevin sədrlik etdiyi Yeni Azərbaycan Partiyası parlamentdə 70 deputatla təmsil olunur.
Vətəndaş Həmrəyliyi Partiyası 3 yer götürüb.
Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyasının hərəyə 1 mandatı var.
40 deputat partiyasızdır.
Milli Məclisdə 22 qadın yer alır.
Deputatların 44-ü əvvəlki Milli Məclisin üzvü olmayan şəxslərdir. Onlardan yalnız birinin – Vətəndaş Həmrəyliyi Partiyasının sədri Sabir Rüstəmxanlının parlament təcrübəsi var. O, 1995, 2000, 2005 və 2010-cu illərdə seçilmiş parlamentlərində təmsil olunub.
1991-ci ildə müstəqilliyini bərpa etmiş Azərbaycanda 2020-ci ilədək beş parlament seçkisi olub: 1995-ci il noyabrın 12-də, 2000-ci il noyabrın 5-də, 2005-ci il noyabrın 6-da, 2010-cu il noyabrın 7-də, 2015-ci il noyabrın 1-də.
Altıncı parlament seçkisi 2020-ci il noyabrın 1-də keçirilməli idi. 2019-cu il dekabrın 5-də prezident İlham Əliyev Milli Məclisi buraxaraq 2020-ci il fevralın 9-na növbədənkənar parlament seçkisi təyin edib.
Milli Məclisin prezidentin təqdimatları əsasında dövlət büdcəsinin təsdiq edilməsi və onun icrasına nəzarət; insan hüquqları üzrə müvəkkilin seçilməsi; baş nazirin vəzifəyə təyin edilməsinə razılıq verilməsi; Konstitusiya Məhkəməsi, Ali Məhkəmə və apellyasiya məhkəmələri hakimlərinin təyin edilməsi; baş prokurorun vəzifəyə təyin və vəzifədən azad edilməsinə razılıq verilməsi; Konstitusiya Məhkəməsinin təqdimatına əsasən prezidentin impiçment qaydasında vəzifədən kənarlaşdırılması; Nazirlər Kabinetinə etimad məsələsinin həll edilməsi və başqa səlahiyyətləri var.
