Oqtay Əsədov kürsüsünü təhvil verir
Martın 10-da yeni Milli Məclisin ilk iclası keçirilir. Novator.az-ın məlumatına görə, iclas ərəfəsində hakim Yeni Azərbaycan Partiyasının parlament sədri postuna 98 saylı Şəmkir şəhər dairəsindən deputat Sahibə Qafarovanı namizəd irəli sürdüyü bəlli olub.
2005-cı il dekabrın 2-dən parlamentin sədri postunu Oqtay Əsədov tutub.
Oqtay Əsədov 1955-ci ildə anadan olub. İndiki Neft və Sənaye Universitetini bitirib. Abşeron Regional Səhmdar Su Cəmiyyətinin, “Azərsu” Səhmdar Cəmiyyətinin prezidenti vəzifəsində çalışıb.
O, fevralın 9-da keçirilmiş parlament seçkisində 45 saylı Abşeron dairəsindən mandat alıb.
Sahibə Əli qızı Qafarova indiki Bakı Slavyan Universitetini və Azərbaycan Dillər Universitetini bitirib. Filologiya elmləri doktoru, professordur. 2010-cu ildən Milli Məclisin deputatıdır.
Milli Məclisə seçki fevralın 9-da 125 dairədə keçirilib. 4 dairə üzrə səsvermənin nəticələri ləğv olunduğu üçün yeni parlament hələlik 121 nəfərdən ibarətdir.
Prezident İlham Əliyevin sədrlik etdiyi Yeni Azərbaycan Partiyası parlamentdə 70 deputatla təmsil olunur.
Vətəndaş Həmrəyliyi Partiyası 3 yer götürüb.
Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyasının hərəyə 1 mandatı var.
40 deputat partiyasızdır.
