Deputat seçilmiş üç nəfər vəzifədən getdi
Prezident İlham Əliyev martın 9-da sərəncamlar imzalayaraq 9 fevral seçkisində Milli Məclisin deputatı seçilmiş üç nəfəri vəzifədən azad edib. Novator.az-ın məlumatına görə, Hicran Kamran qızı Hüseynova Ailə, Qadın və Uşaq Problemləri üzrə Dövlət Komitəsinin sədri, Ceyhun Valeh oğlu Məmmədov Azərbaycan İlahiyyat İnstitutunun rektoru, Aqil Sadıq oğlu Məmmədov Kəlbəcər Rayon İcra Hakimiyyətinin başçısı postundan götürülüb.
Milli Məclisə seçkidə Hicran Hüseynova 41 saylı Sumqayıt, Ceyhun Məmmədov 120 saylı Cəbrayıl-Qubadlı, Aqil Məmmədov 123 saylı Kəlbəcər dairəsindən mandat alıb. Onların üçü də prezident İlham Əliyevin sədrlik etdiyi Yeni Azərbaycan Partiyasının namizədi olub.
Milli Məclisə seçki 125 dairədə keçirilib. 4 dairə üzrə səsvermənin nəticələri ləğv olunduğu üçün yeni parlament hələlik 121 nəfərdən ibarətdir.
Yeni Azərbaycan Partiyası parlamentdə 70 deputatla təmsil olunur.
Vətəndaş Həmrəyliyi Partiyası 3 yer götürüb.
Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyasının hərəyə 1 mandatı var.
40 deputat partiyasızdır.
