Yeni razılaşma qüvvəyə minib
Rusiya ilə Türkiyənin yeni razılaşması qüvvəyə minib. Novator.az-ın məlumatına görə, prezidentlər Vladimir Putin və Rəcəb Teyyub Ərdoğanın martın 5-i Moskvada keçirdiyi görüş üç maddəlik razılaşma ilə bitib. Sənədə əsasən, martın 6-dan təmas xəttində atəş dayanır, Rusiya və Türkiyə M4 şosesindən cənuba və şimala doğru 6 kilometr enində təhlükəsizlik dəhlizi yaradır, martın 15-dən həmin şose boyu birgə patrul nəzarətinə başlayır.
Suriyada 2011-ci ildə prezident Bəşər Əsədin hakimiyyətdən getməsi tələbi ilə başlayan xalq hərəkatı sonradan vətəndaş müharibəsinə çevrilib. Ölkənin Türkiyə ilə sərhəd bölgələrinə nəzarət kürd yaraqlılarının nəzarətinə keçib, onlar Türkiyədəki kürd separatçılarına dəstək veriblər.
Türkiyə Silahlı Qüvvələri ötən ilin oktyabrında sərhəd boyu məskən salan kürd qruplaşmalarını bölgədən sıxışdırıb çıxarmaq üçün Suriyada hərbi əməliyyata başlayıb, xeyli ərazini terrorçulardan təmizləyib.
Bu əməliyyatlardan sonra ABŞ kürdlərin sərhəd zolağından Türkiyənin tələb etdiyi məsafəyə çəkilməsinə, ağır silahların onlardan alınmasına boyun olub.
Ardınca Rusiya ilə razılaşma əldə olunub. Razılaşma kürd birləşmələrinin Türkiyə sərhədindən 30 kilometr geri çəkilməsini, Rusiya və Türkiyə hərbçilərinin ərazidə birgə patrul xidməti aparmasını nəzərdə tutub.
Son vaxtlar Rusiyanın dəstəklədiyi Suriya ordusu İdlib vilayətində dinc əhaliyə, müxalif birləşmələrə, türkiyəli hərbçilərə qarşı hərbi əməliyyatlar keçirib və ərazidə vəziyyət gərginləşib. Türkiyə yaranmış vəziyyətdə Əsəd rejimini və Rusiyanı, Rusiya isə Türkiyəni ittiham edib.
