Kabinetdə tək qadın postdan gedir
Fevralın 9-da seçilmiş yeni Milli Məclisdə 22 qadın var. Novator.az bildirir ki, onların biri Ailə, Qadın və Uşaq Problemləri üzrə Dövlət Komitəsinə sədrlik edən Hicran Hüseynovadır və postunu təhvil verməlidir. Konstitusiyaya görə, Milli Məclisin deputatı icra hakimiyyətində qulluq edə bilməz.
Hicran Hüseynova Nazirlər Kabineti üzvləri arasında yeganə qadındır.
Azərbaycanda ən yüksək vəzifəli qadın birinci vitse-prezident Mehriban Əliyevadır.
Prezident Administrasiyasında iki yüksək post qadınlara tapşırılıb: Cəmilə Abbasova dövlət başçısının köməkçisi, Fərəh Əliyeva humanitar siyasət, diaspor, multikulturalizm və dini məsələlər şöbəsinin müdiridir.
Digər ali qurumlara gəlincə, Dövlət İmtahan Mərkəzinə (Məleykə Abbaszadə) və Dövlət Tərcümə Mərkəzinə (Afaq Məsud (Vəliyeva) qadınlar rəhbərlik edir.
Ombudsman postunda qadın çalışır: Səbinə Əliyeva.
Ölkədə yalnız bir qadın yerli icra qurumuna rəhbərlik edir: İradə Gülməmmədova. O, Abşeron Rayon İcra Hakimiyyətinin başçısıdır.
