Dollar dayanacaqda: 2 il tamam oldu
Mərkəzi Bank martın 6-da ABŞ dollarının məzənnəsini 1,7 manat həddində saxlayıb. Novator.az bildirir ki, bu rəsmi kurs martın 10-dək qüvvədə olacağı üçün qiymət sabitliyinin 2 ili tamamlanır.
2015-ci ilin devalvasiyaları nəticəsində dolların məzənnəsi 0,7844 manatdan 1,5594 manata yüksəlib.
2016-cı ildə rəsmi qiymət 1,7707 manata çatıb.
2017-ci ilin fevralında maksimal qiymət qeydə alınıb: 1,92 manat. Həmin ili 1,7001 manatla yola salan dollar 2018-ci il martın 7-dən banklara 1,7 manata təklif olunur.
Martın 6-da avronun rəsmi kursu 1,9092 manata yüksəlib. 2020-ci ilə 1,9025 manatla başlayan avro yanvarın 8-dən 1 manat 90 qəpikdən ucuz satılırdı.
Dövlət Neft Fondu Mərkəzi Bankın 2020-ci ilin yanvar ayında keçirdiyi valyuta hərraclarında 300,2 milyon ABŞ dolları məbləğində vəsait sərf edib.
2016-cı ildə Dövlət Neft Fondunun analoji xərci 4,9 milyard dollar, 2017-ci ildə 3,6 milyard dollar, 2018-ci ildə 6,5 milyard dollar, 2019-cu ildə 6,6 milyard dollar göstərilib.
Mərkəzi Bankın hesabatına görə, martın 1-nə valyuta ehtiyatının həcmi 6 milyard 400,9 milyon dollara çatıb.
2020-ci il 6 milyard 258 milyon dollarla başlayıb.
2010-cu ilin əvvəlində valyuta ehtiyatı 5 milyard 161,7 milyon dollar olub.
Mərkəzi Bank 2011-ci ilin əvvəlində 6 milyard 407,6 milyon dollar valyuta ehtiyatı olduğunu açıqlayıb.
2012-ci ilə ehtiyatların həcmi 10 milyard 481,5 milyon dollara, 2013-cü ilə 11 milyard 694,8 milyon dollara, 2014-cü ilə 14 milyard 152 milyon dollara qalxıb.
2015-ci ilin əvvəlində 13 milyard 758,3 milyon dollar valyuta ehtiyatı qeydə alınıb. İlin sonuna ehtiyatın həcmi 5 milyard 16,7 milyon dollara enib.
2017-ci il yanvarın 1-nə ehtiyatın həcmi 3 milyard 974,4 milyon dollar, 2018-ci ilin əvvəlinə 5 milyard 334,6 milyon dollar, 2019-cu ilin əvvəlinə 5 milyard 625,7 milyon dollar göstərilib.
