Yeni baş nazir, yeni hökumət
Ukrayna parlamenti – Ali Rada martın 4-ü axşam prezident Vladimir Zelenskinin təqdimatına baxaraq Denis Şmıqalı baş nazir postuna təyin edib.
Novator.az-ın məlumatına görə, 1975-ci ildə Lvov şəhərində doğulan Denis Şmıqal iqtisad elmləri namizədidir. İvano-Frankovsk Vilayət Administrasiyasının başçısı olub, bu il fevralın 4-dən baş nazirin müavini-icma və ərazilərin inkişafı naziri müavini vəzifəsində çalışıb.
Ali Rada yeni hökumətin tərkibini də təsdiqləyib. Əvvəlki hökumətin dörd naziri, o cümlədən daxili işlər naziri, Bakı ermənisi Arsen Avakov postunu qoruyub.
1964-cü ildə Azərbaycan paytaxtında doğulan Arsen Avakov iki yaşından Ukraynada yaşayır. Xarkov Politexnik İnstitutunu bitirib. Uzun müddət bizneslə məşğul olub. 2005-2010-cu illərdə Xarkov vilayətinin qubernatoru postunu tutub, sonra Ali Radanın deputatı seçilib. 2014-cü il fevralın 22-dən daxili işlər naziridir.
Ukrayna Konstitusiyasına əsasən, hökuməti parlamentdə azı 226 mandatı olan siyasi qüvvə formalaşdırır. Ötən il iyulun 21-də keçirilmiş parlament seçkisində prezident Vladimir Zelenskini dəstəkləyən Xalq Xidmətçisi Partiyası qalib gəlib, avqustun 29-da yeni hökumət qurulub. Həmin vaxtdan baş nazir postunu 1984-cü il təvəllüdlü Aleksey Qonçaruk tutub. O, martın 4-də istefa verib.
