“Kölgə iqtisadiyyatına yol vermək olmaz”
“Sahibkarlığın inkişafı ölkəmizin inkişafının əsas şərti olacaq”. Martın 4-də Ağstafa Aqrar Sənaye Kompleksinin açılışında iştirak edən prezident İlham Əliyev belə deyib.
AZƏRTAC-ın arayışına görə, layihənin ikinci mərhələsi tamamlanan kompleksdə paxlalı bitkilərin toxumu istehsalı zavodu, dənli bitkilərin toxumu istehsalı zavodu, rezervuarlar quraşdırılıb. Kompleksdə dəyirman, çörək və yarımfabrikatlar istehsalı zavodu, müasir avadanlıqlarla təchiz edilmiş fast-food iaşə xidmətləri obyekti, aqromarket də istifadəyə verilib.
Dövlət başçısı müəssisənin kollektivi ilə görüşündə sahibkarlar, investorlar üçün gözəl şərait yaradıldığını vurğulayıb: “Bilirlər ki, dövlət onların arxasındadır. Bilirlər ki, Azərbaycan bundan sonra da sabitlik yolu ilə gedəcək. Hər bir investor öz investisiyalarını planlaşdıranda mütləq bu amilləri nəzərə alır. Bir çox xarici investorla görüşlər əsnasında onların mənə bildirdikləri əsas fikir o idi ki, Azərbaycanda sabitlik var. Bu sabitliyin artıq 27 yaşı var və bundan sonra da ölkənin uğurlu inkişafı heç kimdə şübhə doğurmur.
Sahibkarlığın inkişafı bundan sonra ölkəmizin inkişafının əsas şərti olacaq. Dövlət xətti ilə icra edilən əsas infrastruktur layihələri başa çatmaq üzrədir. Biznes mühitinin yaxşılaşdırılması, sahibkarlığın inkişafı, yeni iş yerlərinin yaradılması – bütün bunlar dövlət siyasətimizin tərkib hissəsidir. İnvestorlar da belə gözəl müəssisələrin yaradılması ilə digər sahibkarlara da yol göstərirlər ki, gəlin, siz də vəsait qoyun.
Azərbaycanlı investorlar ilk növbədə Azərbaycana vəsait qoymalıdırlar ki, bizdə işlər daha yaxşı getsin. Çünki əhalimiz artır. Biz hər il 100 min artan əhalini gələcəkdə iş yerləri ilə təmin etməliyik. Ona görə iqtisadi inkişaf, sərmayə qoyuluşu demoqrafik inkişafı üstələməlidir. Bu, əsas vəzifədir.
İşlə təmin edilən vətəndaşlar yaxşı maaşla təmin olunmalıdırlar, onların iş şəraiti yaxşı olmalıdır. Mən demişəm ki, 8 saatlıq iş günü var və heç bir işçini ondan artıq işlətmək olmaz. Eyni zamanda bütün işçilər gərək rəsmi qaydada maaş alsınlar, kölgə iqtisadiyyatına yol vermək olmaz. Qeyri-rəsmi məşğulluğa yol vermək olmaz”.
