Şəmkir və Qazax ziyarətləri
Prezident İlham Əliyev martın 3-də Şəmkir rayonuna səfər edib. AZƏRTAC xəbər verir ki, dövlət başçısı Şəmkir-Abbaslı-Nərimanlı avtomobil yolunun yenidənqurmadan sonra açılışına qatılıb. Arayışa görə, uzunluğu 15 kilometr olan yolun tikintisi 71 min nəfər əhalinin yaşadığı 8 yaşayış məntəqəsini rayon mərkəzi ilə birləşdirməklə yanaşı sakinlərin Bakı-Ələt-Qazax-Gürcüstan sərhədi avtomobil yoluna çıxışına imkan verir.
Həmin gün “Şəmkirçay” Sutəmizləyici Qurğular Kompleksi istifadəyə verilib. Açılış mərasimində çıxış edən İlham Əliyev deyib ki, ölkənin əksər şəhərlərinin içməli su problemləri həll olunub, o cümlədən Şəmkir şəhərinin: “Verilən məlumata görə, şəhərin kanalizasiya məsələsi də bu ilin sonuna qədər başa çatacaq. Samux şəhərinin də su problemi bu il həll olunacaq. Beləliklə, hələ də təmiz içməli su ilə təmin edilməyən şəhərlərin sayı təqribən 3-5 ətrafındadır. Onlar da maksimum iki il ərzində içməli su ilə təmin ediləcək.
Eyni zamanda müxtəlif qurumlarla kəndlərin su təminatı təşkil edilir – həm “Azərsu”, həm də Ekologiya və Təbii Sərvətlər Nazirliyinin xətti ilə təmizləyici qurğular hesabına.
Bakı şəhərinin su problemləri həllini tapır. Mənə verilən məlumata görə, Bakı əhalisinin 80 faizi bu gün təmiz içməli su ilə davamlı təmin edilir. Bu proses hələ davam etdiriləcək”.
İlham Əliyev Qazax rayonuna da baş çəkib, Daş Salahlı-Ürkməzli-Dəmirçilər avtomobil yolunun yenidənqurmadan sonra açılışına qatılıb.
Əhəng zavodunun açılışında iştirak edən dövlət başçısı deyib ki, ölkədə sərmayə iqlimi çox müsbətdir: “Keçən il ölkə iqtisadiyyatına 13,5 milyard dollar sərmayə qoyulub. Bu il də proses davam etdirilir və sərmayənin böyük hissəsi yerli sərmayədir. Bu onu göstərir ki, yerli şirkətlər artıq ayaqda möhkəm dayana bilir və dövlətin dəstəyi ilə bu işlər davam etdiriləcək. Təkcə Sahibkarlığın İnkişafı Fondunun xətti ilə sahibkarlara 2 milyard manat məbləğində güzəştli kreditlər verilib və bu kreditlərin hesabına on minlərlə yeni iş yeri yaradılıb”.
Prezident Qazax Rayon Mərkəzi Xəstəxanasının açılışında da iştirak edib, həmçinin “Azərxalça” Açıq Səhmdar Cəmiyyətinin Qazax filialının fəaliyyəti ilə tanış olub.
