Müsavatçılar aksiyanı dayandırıblar
Müsavatçı fəallar Elman Quliyev və Elşad İsrafil aclıq aksiyasını dayandırıblar.
Onlar fevralın 9-da keçirilmiş parlament seçkisinin rəsmi nəticələrinin ləğv olunmasını tələb edirdilər.
Seçkidə Elman Quliyev 12 saylı Qaradağ-Binəqədi-Yasamal dairəsindən, Elşad İsrafil 42 saylı Sumqayıt dairəsindən namizəd olublar.
Müsavat Partiyasının mərkəzi qərargahında keçirilən aksiya fevralın 27-də başlanmışdı.
Elman Quliyevin “Turan”a verdiyi məlumata görə, aksiya martın 3-də Müsavat Divanı üzvlərinin xahişi ilə dayandırılıb.
9 fevral seçkisi 125 dairəni əhatə edib. 4 dairədəki səsvermənin nəticələri ləğv olunub. Mərkəzi Seçki Komissiyası fevralın 25-də 121 qalib namizədin adını təsdiq üçün Konstitusiya Məhkəməsinə göndərib. Konstitusiya Məhkəməsi təqdimata martın 5-də baxacaq.
Rəsmi nəticələrə görə, hakim Yeni Azərbaycan Partiyasından 70 nəfər deputat seçilib. Qaliblər arasında Vətəndaş Həmrəyliyi Partiyasının 3, Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyasının hərəyə 1 təmsilçisi var, 40 nəfər isə partiyasızdır.
