Narkotik cinayətlərinin hesabatı
Narkotik vasitələrlə bağlı cinayətlərin hesabatı yayılıb. Dövlət Statistika Komitəsi Daxili İşlər Nazirliyinə istinadla bildirir ki, 2019-cu ildə Azərbaycanda qeydə alınmış cinayət hadisələrinin 4383-ü narkotik vasitələrin və psixotrop maddələrin qanunsuz dövriyyəsi ilə əlaqədar olub.
Cinayətlərin 59,1 faizi qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə, saxlama, hazırlama, emal etmə, daşıma, 33,4 faizi eyni hərəkətləri satış məqsədilə etmə, habelə bu maddələri istehsal etmə, göndərmə, yaxud qanunsuz olaraq satma, 6,1 faizi qanunsuz olaraq tərkibində narkotik maddələr olan bitkiləri kultivasiya etmə, 1,3 faizi güclü təsir edən və ya zəhərli maddələrin satış məqsədilə qanunsuz dövriyyəsi ilə bağlı cinayətlər, 0,1 faizi digər cinayətlər kimi rəsmiləşib.
Rəsmi məlumata görə, il ərzində narkotik vasitələrin və psixotrop maddələrin qanunsuz dövriyyəsi ilə bağlı 3464 nəfər cinayət törətmiş şəxs müəyyən edilib, onların 98,8 faizi cinayət məsuliyyətinə cəlb olunub.
