Jurnalist Hidayət Zeynalov vəfat edib
Martın 1-də qocaman jurnalist Hidayət Zeynalov vəfat edib.
Hidayət Əkbər oğlu Zeynalov 1926-cı ildə Qazaxda doğulub. Bakı Darülfünunun fars dili və ədəbiyyatı fakültəsini bitirsə də, ömrünü, taleyini jurnalistikaya bağlayıb.
Sovet dövründə 40 ildən artıq “Kommunist” qəzetində çalışıb. Ştatdankənar müxbirlikdən şöbə müdiri vəzifəsinədək yüksəlib.
Hidayət Zeynalov həm də gözəl oçerklərin, xüsusən Azərbaycanda çox az yazılan təbiət oçerklərinin müəllifi kimi tanınıb. Onun oçerkləri bir neçə dəfə kitab halında nəşr olunub.
Hidayət Zeynalovun yazıları uzun illər örnək kimi indiki Bakı Dövlət Universitetinin jurnalistika fakültəsində tədris edilib.
Hidayət Zeynalovun ömür-gün yoldaşı Məryəmxanım Həsənzadə də jurnalist olub. Oğlanları Araz və Aqşin Zeynalovlar, gəlinləri Afaq Vasifqızı və Rəbiyyə Şıxəliyeva da çağdaş mətbuatda tanınan imzalardır. Nəvələri Elxan Qaraqan yazıçı, Orxan Zeynallı isə repçidir.
Hidayət Zeynalov jurnalistika sahəsində xidmətlərinə görə bir sıra mükafatlarla təltif edilib, o cümlədən “Qızıl qələm” mükafatına və əməkdar jurnalist fəxri adına layiq görülüb.
Allah rəhmət eləsin!
