Cəbhəçi fəallar aksiya keçirib
AXCP-nin bir qrup qadın fəalı fevralın 28-i günorta Bakıda, Daxili İşlər Nazirliyinin binası qarşısında toplaşıb. Onlar 10 sutka inzibati həbs cəzası alan partiya fəalı Məmməd İbrahimə azadlıq tələb ediblər.
“Turan”ın məlumatına görə, polis əməkdaşları qadınları nazirliyin qarşısından uzaqlaşdırıb, ardınca aksiyaçılar küçədə yürüş edərək “Məmməd İbrahimə azadlıq!”, “İstefa!” şüarları səsləndiriblər.
AXCP Ali Məclisi Rəyasət Heyətinin üzvü Məmməd İbrahimə 10 sutkalıq inzibati həbs cəzası fevralın 27-si Xətai Rayon Məhkəməsində çıxarılıb. Partiya fəalı İnzibati Xətalar Məcəlləsinin 535.1-ci maddəsi ilə polisin qanuni tələbinə qəsdən tabe olmamaqda təqsirli bilinib.
Məmməd İbrahim fevralın 26-sı paytaxtda Xocalı soyqırımı qurbanlarının xatirəsinə ucaldılmış abidəni ziyarət edəndən az sonra tutulub. Həmin vaxt o, AXCP Ali Məclisi Rəyasət Heyətinin digər üzvü Asif Yusifli ilə bir yerdə olub. Polislər onları Xətai Rayon Polis İdarəsinin 37-ci bölməsinə aparıblar. Asif Yusifli buraxılıb, Məmməd İbrahim isə bölmədə saxlanıb.
Məmməd İbrahim 2015-2019-cu illərdə həbsdə yatıb. O, 2015-ci ilin sentyabrında tutulub, üç nəfəri döyməkdə ittiham olunub. 2016-cı il martın 15-də Nərimanov Rayon Məhkəməsi Məmməd İbrahimi 3 illiyə azadlıqdan məhrum edib.
2018-ci il sentyabrın son günlərində, 3 illik həbs cəzasının başa çatmasına bir neçə gün qalmış 16 saylı Cəzaçəkmə Müəssisəsində Məmməd İbrahimin yastığının altından bıçaq tapıldığı bəyan olunub. 2019-cu il yanvarın 10-da Suraxanı Rayon Məhkəməsi Məmməd İbrahimi cəzaçəkmə müəssisəsində qadağan olunmuş əşya saxlanmasında təqsirli bilərək 5 ay 22 gün müddətinə azadlıqdan məhrum edib. Fevralın 13-də Bakı Apellyasiya Məhkəməsi Məmməd İbrahimə verilmiş 5 ay 22 gün azadlıqdan məhrumetmə cəzasını azaldaraq faktiki həbsdə yatdığı müddətlə əvəzləyib və onu azadlığa buraxıb.
