İsgəndər Həmidov dəfn edilib
Milli azadlıq hərəkatının liderlərindən olan sabiq daxili işlər naziri İsgəndər Həmidov fevralın 26-sı Bakının Sulutəpə qəsəbəsindəki qəbiristanlıqda, mərhum həyat yoldaşının yanında torpağa tapşırılıb.
Musavat.com-un məlumatına görə, dəfn mərasimində çıxış edən Milli Strateji Düşüncə Mərkəzinin sədri İsa Qəmbər deyib ki, İsgəndər Həmidov Qarabağ yolunda hər zaman fədakarlıq edən, sevilən bir insan idi: “İllərlə həbsdə yatdı və dedi ki, Azərbaycan bayrağı olan zindanda yatmaq mənim üçün şərəfdir. Hamımız gedəcəyik. Bizə qalan onun ruhunu şad etməkdir”.
Xalq Partiyasının sədri Pənah Hüseyn deyib ki, İsgəndər Həmidov qəhrəmanlıq göstərmiş əsgərdir, yaddaşlarda “Cənab general” kimi qalacaq.
Müsavat başqanı Arif Hacılı qeyd edib ki, İsgəndər Həmidov istiqlal mübarizi olub: “Heç zaman əqidəsindən dönmədi. Daim mübarizənin önündə oldu. Onun arzuları tam gerçəkləşmədi, amma yaxın zamanlarda bütün istəklərinin həyata keçəcəyinə inanırıq”.
AXCP sədri Əli Kərimli İsgəndər Həmidovun hər zaman mübarizənin önündə olduğunu vurğulayıb: “Təəssüf ki, amansız xəstəlik onu çox pis yaxaladı. Hər zaman belə insanlar həyatdan gedəndə bizlərin məsuliyyəti artır”.
Ürəyi xəstə olan İsgəndər Həmidov bu gün paytaxtdakı “City Hospital”da vəfat edib.
1948-ci il təvəllüdlü İsgəndər Həmidov iqtisadiyyat və hüquq sahələri üzrə iki ali təhsil alıb. Uzun illər daxili işlər orqanlarında xidmət edib. 1988-1991-ci illərin milli azadlıq hərəkatının öncül şəxslərindən biri kimi tanınıb. 1990-cı ildən parlamentin üzvü olub. Daxili işlər naziri postunu 1992-1993-cü illərdə, Əbülfəz Elçibəyin prezidentliyi zamanı tutub. 1995-2003-cü illərdə həbsdə yatıb. Məhkum edilərkən İsgəndər Həmidov general-leytenant ali hərbi rütbəsindən məhrum olunub.
