1/8 final yarılanır
UEFA Çempionlar Liqasının 1/8 finalı davam edir. Novator.az-ın məlumatına görə, fevralın 25-də keçirilmiş “Çelsi” (İngiltərə) – “Bavariya” (Almaniya) matçında qonaqlar 3 cavabsız topla üstün gəlib, “Napoli” (İtaliya) ilə “Barselona” (İspaniya) xalları bölüblər – 1:1.
Ötən həftə “Atletiko” (İspaniya) “Liverpul”u (İngiltərə) 1:0, “Borussiya” (Dortmund, Almaniya) PSJ-ni (Fransa) 2:1, “Atalanta” (İtaliya) “Valensiya”nı (İspaniya) 4:1 yenib, “Tottenhem” (İngiltərə) – “Leypsiq” (Almaniya) oyunu 0:1 hesabı ilə başa çatıb.
1/8 finalın digər oyunları fevralın 26-na təyin olunub:
“Real” (İspaniya) – “Mançester Siti” (İngiltərə)
“Lion” (Fransa) – “Yuventus” (İtaliya).
1955-ci ildə yaradılmış, 1991-ci ilə qədər Çempionlar kuboku adlanmış turniri “Real” 13, “Liverpul” 6, “Bavariya” və “Barselona” 5, “Yuventus” 2, “Borussiya” və “Çelsi” 1 dəfə zirvədə tamamlayıb.
