Parlamentdə neçə deputat olsun? (Namizədlərin rəyi)
Azərbaycan parlamenti – Milli Məclis 125 deputatdan ibarətdir. Zaman-zaman Milli Məclisdə deputat yerlərinin artırılması və ya azaldılması barədə təkliflər olur. Novator.az fevralın 9-da keçirilmiş parlament seçkisinin bir neçə namizədinə “Milli Məclisin neçə nəfərdən ibarət olmasını istərdiniz” sualı ilə müraciət edib.
10 saylı Binəqədi dairəsindən namizəd Rəbiyyə Məmmədova:
– Əsas istəyim parlamentin xalqın seçdiyi adamlardan ibarət olması və millətin maraqlarına xidmət etməsidir. Kəmiyyət, Milli Məclisin neçə nəfərdən ibarət olması önəmli deyil, əsas keyfiyyətdir. Təəssüf ki, nə Milli Məclisin işində keyfiyyət görürük, nə də millət vəkillərinin fəaliyyətində.
61 saylı Neftçala dairəsindən namizəd Ramil Baba:
– Deputatların sayı texniki məsələdir, əsas onların xalqı təmsil etməyə layiq olmasıdır. Parlament 10 milyonluq Azərbaycan xalqının səsini çatdıran tribunaya çevrilməlidir.
29 saylı Səbail dairəsindən namizəd Bəxtiyar Hacıyev:
– Milli Məclisdə neçə nəfərin təmsil olunmasından daha önəmli məsələ var: deputatların necə seçilməsi. Mandatı saxta yolla alacaqlarsa, parlamentin 1500 nəfərlik olması ilə 15 nəfərlik olmasının heç bir fərqi yoxdur. Ədalətli və azad seçki keçirilsə, Azərbaycana indiki kimi 125 nəfərlik parlament də kifayətdir.
124 saylı Şuşa-Ağdam-Xocalı-Xocavənd dairəsindən namizəd Elxan Süleymanlı:
– Əvvəla, Milli Məclisə gerçək seçki keçirilməsinə nail olmaq lazımdır, təyinatlı parlamentdə deputatların sayı heç bir önəm kəsb etmir. Deputatların sayına gəlincə, mən seçki dairələrinin formalaşdırılması prinsipinin dəyişməsinin tərəfdarıyam. İndi dairələr orta hesabla 40-45 min seçici prinsipi əsasında qurulur. Dairələri hər inzibati rayon üzrə minimum bir deputat prinsipi ilə formalaşdırmaq daha doğru olardı. İndi 125 dairənin 25 faizindən çoxu qarışıq, yəni bir neçə rayonu əhatə edən dairələrdir, bu isə təmsilçilik baxımından problemlər yaradır.
İlkin Nizami
