Naxçıvanın sosial-iqtisadi göstəriciləri
Naxçıvan Muxtar Respublikasının Statistika Komitəsi yeni hesabat yayıb. Novator.az bildirir ki, rəsmi açıqlamaya görə, 2020-ci ilin yanvar ayında muxtar respublikada 173 milyon 71,9 min manatlıq ümumi daxili məhsul istehsal olunub, bu da 2019-cu ilin ilk ayı ilə müqayisədə 1 faiz çoxdur.
Hər bir nəfərə düşən ümumi daxili məhsulun həcmi 376,4 manat göstərilir.
Sənayedə istehsalın 2019-cu ilin yanvarı ilə müqayisədə 1 faiz, sərmayə qoyuluşunun 1 faiz, kənd təsərrüfatında istehsalın 3,1 faiz, informasiya və rabitə xidmətlərinin dəyərinin 1,2 faiz, hüquqi və fiziki şəxslərin kreditlə təminatının 4,2 dəfə artdığı vurğulanır.
Qeyd olunur ki, yanvar ayında 32,8 milyon ABŞ dolları dəyərində xarici ticarət dövriyyəsi qeydə alınıb, bunun 24 milyon dollardan çoxu ixracdır.
Hesabata əsasən, 2020-ci ilin əvvəlinə muxtar respublika iqtisadiyyatında bir işçiyə hesablanmış orta aylıq əməkhaqqı 484,8 manata çatıb.
