İşğalçı rejimin ordusunda yeni komandan
İşğalçı Dağlıq Qarabağ rejiminin “müdafiə naziri” (ordu komandanı) dəyişib. Novator.az-ın məlumatına görə, rejimin başçısı Bako Saakyanın 24 fevral fərmanı ilə Karen Abramyanı Cəlal Arutyunyan əvəzləyib.
General-leytenant Karen Abramyan “müdafiə naziri” postunu 2018-ci ilin dekabr ayından tuturdu.
Cəlal Arutyunyan general-mayordur. Bu təyinata qədər işğalçı ordunun qərargah rəisi, “müdafiə nazirinin müavini” idi.
1988-ci ilin fevralında Azərbaycanın Dağlıq Qarabağ vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ilin mayında atəşkəslə dayanan müharibədə Ermənistan Dağlıq Qarabağı və onun ətrafındakı 7 rayonu işğal edib.
