Əməliyyat keçirilən rayonun başçısı postdan götürüldü
Prezident İlham Əliyev fevralın 20-də sərəncam imzalayaraq İsmayıl Məhərrəm oğlu Vəliyevi Neftçala Rayon İcra Hakimiyyətinin başçısı vəzifəsindən azad edib.
Novator.az bildirir ki, İsmayıl Vəliyev Neftçala Rayon İcra Hakimiyyətinin başçısı vəzifəsini 26 aprel 2011-ci ildən tuturdu.
1959-cu ildə Gəncə şəhərində doğulan İsmayıl Vəliyev Bakı Dövlət Universitetinin məzunudur. Əli Bayramlı Şəhər Xalq Deputatları Sovetində, Azərbaycan Ali Sovetinin Rəyasət Heyətində, Prezidentin İcra Aparatında, Dövlət Gömrük Komitəsində məsul vəzifələr tutub, 2005-2011-ci illərdə Qobustan rayonunun icra başçısı olub.
Dövlət Təhlükəsizliyi Xidmətinin fevralın 20-də yaydığı məlumatda qeyd olunub ki, Neftçala Rayon İcra Hakimiyyətinin vətəndaşların hüquqlarına, cəmiyyətin və dövlətin qanunla qorunan mənafelərinə mühüm zərər vuran çoxsaylı cinayət əməllərinə yol vermələri ilə bağlı başlanmış iş üzrə kompleks əməliyyat-istintaq tədbirləri həyata keçirilir.
Araşdırmalar əsasında şübhəli şəxs qismində tutularaq cinayət məsuliyyətinə cəlb edilən şəxslər və onların törətdiyi cinayət əməlləri barədə ictimaiyyətə geniş məlumat veriləcəyi vurğulanıb.
