Ali Məhkəməyə müraciətlər 26,8 faiz artıb
Fevralın 20-də Ali Məhkəmə Plenumunun iclası keçirilib. AZƏRTAC xəbər verir ki, iclasda ötən il Ali Məhkəmənin 7 hakiminin son yaş həddinə çatdığına görə təqaüdə göndərildiyi açıqlanıb.
Plenumda kollegiya sədrlərinin 2019-cu ilə dair məruzələri dinlənib. Diqqətə çatdırılıb ki, Ali Məhkəmənin mülki və hərbi kollegiyalarında 2019-cu ildə baxılmış işlər 2018-ci illə müqayisədə azalıb, cinayət və inzibati-iqtisadi kollegiyalarda isə artıb: “Mülki kollegiyada 5,6 faiz, hərbi kollegiyada 10,8 faiz azalma, cinayət kollegiyasında 8, inzibati-iqtisadi kollegiyada 46,4 faiz artma müşahidə olunub. Ümumiyyətlə, Ali Məhkəməyə daxil olmuş işlərin sayı 4,4 faiz artıb.
Ötən il Ali Məhkəmə Plenumunun 6 iclası keçirilib və 21 qərar qəbul edilib. Həmçinin işlərə baxılarkən aşkarlanmış nöqsanlar barədə 38 xüsusi qərar çıxarılıb. Ali Məhkəməyə müraciətlərdə ötən illə müqayisədə 26,8 faiz artım müşahidə olunub”.
