İnkişaf yox, tənəzzül
İqtisadçı Qubad İbadoğlu 2012-ci il dekabrın 29-da təsdiqlənmiş “Azərbaycan 2020: gələcəyə baxış” inkişaf konsepsiyası ilə bağlı şərh yayıb. Novator.az-ın məlumatına görə, ekspert yazır ki, 2013-cü ildən tətbiqinə başlanan konsepsiyada dövrün sonuna Azərbaycanda adambaşına düşən ümumi daxili məhsulun (ÜDM) həcminin iki dəfə artaraq 13000 ABŞ dollarına, qeyri-neft sektoru üzrə adambaşına ixracın həcminin 1000 ABŞ dollarına çatacağı qeyd olunub: “Dövlət Statistika Komitəsinin (DSK) hesabatına əsasən, 2019-cu ilin sonuna əhalinin hər nəfərinə düşən ÜDM 8247 manat və ya 4851dollar olub. Bu göstərici konsepsiyada hədəflənən səviyyədən 8149 dollar və ya 2,7 dəfə azdır. Azərbaycanda adambaşına ÜDM hətta 2012-ci ildəki start vəziyyəti ilə müqayisədə 1649 dollar və ya 1,34 dəfə aşağıdır.
DSK-nın ötən ilin yanvar-noyabr aylarına olan məlumatına görə, qeyri-neft ixracı faktiki qiymətlərlə 1,78 milyard dollar təşkil edib. Həmin tarixə qeyri-neft sektoru üzrə adambaşına düşən ixrac göstəricisi 177 dollar olub, bu da hədəflənən göstəricidən 823 dollar və ya 5,65 dəfə azdır.
Beləliklə, ölkə “Azərbaycan 2020: gələcəyə baxış” inkişaf konsepsiyasının icraya başlandığı dövrlə müqayisədə irəli yox, geri gedib. Halbuki Azərbaycan 2012-ci ildən bəri neft-qaz satışından 100 milyard dollardan çox gəlir əldə edib”.
