Təkrar seçki: qayda və tarix
Mərkəzi Seçki Komissiyası fevralın 9-u 125 dairədə keçirilmiş parlament seçkisi üzrə şikayətlərə baxaraq 33, 35, 74 və 80 saylı dairələrdəki səsvermənin nəticələrini ləğv edib. 13 fevral qərarlarında qeyd olunub ki, səsvermə keçirilməsi və ya səsvermənin nəticələrinin müəyyənləşdirilməsi zamanı törədilən qanun pozuntuları seçicilərin iradəsini müəyyənləşdirməyə imkan vermir.
Novator.az xəbər verir ki, ana qanuna və Seçki Məcəlləsinə görə, parlament seçkisinin yekunlarını Konstitusiya Məhkəməsi yoxlayıb təsdiqləyir. Mərkəzi Seçki Komissiyası səsvermə günündən uzağı 20 gün keçənədək dairə seçki komissiyalarının protokollarını onlara əlavə edilən sənədlərlə birlikdə yoxlayıb Konstitusiya Məhkəməsinə ötürməlidir.
Seçki dairə üzrə etibarsız sayılarsa və ya onun yekunları təsdiq edilməzsə, təkrar seçki keçirilir. Təkrar seçki barədə qərarı prezident verir.
1991-ci ildə müstəqilliyini bərpa etmiş Azərbaycanda 2020-ci ilədək daha beş parlament seçkisi olub: 1995-ci il noyabrın 12-də, 2000-ci il noyabrın 5-də, 2005-ci il noyabrın 6-da, 2010-cu il noyabrın 7-də, 2015-ci il noyabrın 1-də.
Novator.az bildirir ki, indiyədək üç parlament seçkisi zamanı Milli Məclisin ilk cəhddən tam formalaşması mümkün olmayıb. 2000-ci ilin parlament seçkisində 11 seçki dairəsi üzrə nəticələr ləğv edilib. 2001-ci ildə həmin 11 dairədə təkrar seçkilər olub.
2005-ci ildə 10 seçki dairəsi üzrə səsvermənin nəticələri etibarsız sayılıb. Həmin dairələrdə təkrar seçkilər 2006-cı ildə keçirilib.
2015-ci ildə 1 dairə üzrə səsvermənin nəticəsi etibarsız hesab edilib, 2016-cı ildə həmin dairədə təkrar seçki olub.
