Münhendə çıxış və görüşlər
Münhen Təhlükəsizlik Konfransına qatılmaq üçün Almaniyaya gedən prezident İlham Əliyev fevralın 14-də “Enerji təhlükəsizliyi” mövzusunda dəyirmi masada çıxış edib.
AZƏRTAC xəbər verir ki, İlham Əliyev daha əvvəl Almaniyanın Şərqi Biznes Assosiasiyasının baş icraçı direktoru Mixael Harms və assosiasiyanın Cənubi Qafqaz ölkələri üzrə işçi qrupunun rəhbəri, “Veridos GmbH” şirkətinin baş icraçı katibi Andreas Reşmayerlə görüşüb.
Prezident deyib ki, Münhen auditoriyası qarşısında çıxış etmək üçün hər zaman yaxşı fürsətdir: “Çünki dünyada, regionumuzda vəziyyət dəyişir. Azərbaycanda yeni inkişaf mərhələsinə qədəm qoyuruq. Buna görə də bu mühüm məsələlərin müzakirəsi çox önəmlidir.
Xüsusilə səfərimin ikitərəfli formatı da çox əhəmiyyətlidir. Çoxsaylı görüşlər var. Əksər hallarda bəzi ilkin fikir mübadilələri bir sıra çox nəzərəçarpacaq nəticələrə gətirib çıxarıb. Buradakı təmaslar nəticəsində çoxlu sayda ticarət müqavilələri imzalanıb. Həmçinin zəruri olan regional təhlükəsizlik, regional əməkdaşlıq, enerji siyasəti dünya üçün daha çox əhəmiyyət kəsb edir”.
Görüşdə Azərbaycanda iqtisadiyyatın qeyri-neft sektorunun inkişafı və şaxələndirilməsi istiqamətində görülən işlər barədə məlumat verilib.
Dövlət başçısı Şanxay Əməkdaşlıq Təşkilatının baş katibi Vladimir Norov, Küveytin baş naziri Şeyx Sabah Xalid əl-Həməd əl-Sabah, Beynəlxalq Qırmızı Xaç Komitəsinin prezidenti Peter Maurer ilə də bir araya gəlib.
