Məşğulluq: tədbirlər planı təsdiqlənib
Prezident İlham Əliyev məşğulluq strategiyasına dair tədbirlər planını təsdiqləyib (Plan). 2020-2025-ci illəri əhatə edən tədbirlərin icrasını əlaqələndirmək Əmək və Əhalinin Sosial Müdafiəsi Nazirliyinə həvalə olunub.
Novator.az-ın məlumatına görə, nəzərdə tutulan tədbirlər sırasında əmək bazarının tənzimlənməsi istiqamətində qanun yenilikləri ilə bağlı təkliflərin hazırlanması; minimum əməkhaqqının mərhələlərlə artırılmasına dair təkliflərin hazırlanması; əmək miqrasiyası kvotasının müəyyən edilməsi və iş icazələrinin verilməsi prosedurunun təkmilləşdirilməsinə dair təkliflərin hazırlanması; əcnəbilərə və vətəndaşlığı olmayan şəxslərə Azərbaycan ərazisində haqqı ödənilən əmək fəaliyyəti ilə məşğul olmaları üçün iş icazələri verilməsi sisteminin tam elektronlaşdırılması; beynəlxalq əmək standartlarına uyğun olaraq qadınların əməyinin tətbiqi qadağan olunan iş yerlərinin siyahısının təkmilləşdirilməsinə dair təkliflərin hazırlanması; işaxtaran və işsiz şəxslərin işə düzəlməsində vasitəçilik fəaliyyətini həyata keçirən hüquqi şəxslərin vahid reyestrinin yaradılması; işəgötürənlərlə Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin yerli qurumları arasında əlaqə mexanizminin təkmilləşdirilməsi; regionların sosial-iqtisadi inkişaf prioritetləri nəzərə alınaraq işsiz və işaxtaran şəxslər üçün regional peşə təhsili mərkəzləri şəbəkəsinin genişləndirilməsi və idarəetmə sisteminin təkmilləşdirilməsi kimi məsələlər var.
