Suriya parlamenti “erməni soyqırımını” tanıdı
Fevralın 13-də Suriya parlamenti qondarma erməni soyqırımını tanıyan və qınayan qətnamə qəbul edib. Sənəd yekdilliklə qəbul olunub. Novator.az bildirir ki, rəsmi məlumatı Suriya Ərəb Respublikasının Ermənistandakı səfirliyi yayıb.
Saxta soyqırımı iddialarına əsasən, 1915-ci il aprelin 24-dən başlayaraq 1923-cü ilə kimi Türkiyədə 1 milyon 500 min nəfər erməni öldürülüb. Bu iddiaları indiyədək bir çox ölkə (Fransa, İtaliya, İsveç, İsveçrə, Avstriya, Niderland, Belçika, Lüksemburq, Yunanıstan, Kipr, Danimarka, Polşa, Çexiya, Slovakiya, Vatikan, Litva, Rusiya, Kanada, Uruqvay, Braziliya, Argentina, Çili, Venesuela, Boliviya, Livan və s.), bəzi beynəlxalq qurumlar rəsmən tanıyıb.
Ötən il ABŞ Konqresinin hər iki qanadı – Nümayəndələr Palatası və Senat qondarma erməni soyqırımını tanıyan qətnamələrə səs verib.
Həmsərhəd ölkələr olan Suriya ilə Türkiyənin münasibətləri 2011-ci ildən bəri gərgindir. Buna Türkiyənin Əsəd sülaləsinə qarşı həmin il başlayan xalq üsyanına dəstək verməsi səbəb olub.
2000-ci ildən ölkədə prezident postunu Bəşər Əsəd tutur. 1971-2000-ci illər arasında isə Suriyaya onun atası Hafiz Əsəd prezidentlik edib.
