İsgəndər Həmidovu xaricə aparmaq məsləhət olmayıb
Bakıdakı “City Hospital”ın həkimi, tibb elmləri doktoru, professor Adil Qeybulla sabiq daxili işlər naziri İsgəndər Həmidovun səhhəti ilə bağlı məlumat yayıb.
Ürəyi xəstə olan İsgəndər Həmidov 2018-ci ilin dekabrından bəri Azərbaycanda və Türkiyədə bir neçə müayinə və müalicə kursundan keçib. Bu il yanvarın 24-dən o, Mərkəzi Klinik Xəstəxanada müalicə alıb, fevralın 5-də koma vəziyyətində “City Hospital”a köçürülüb.
Fevralın 13-də özünün “Facebook” səhifəsində açıqlama yayan həkim Adil Qeybulla bildirir ki, İsgəndər Həmidovun vəziyyəti ağırdır: “Bir neçə gün öncə Türkiyədən gəlmiş neyrocərrah professor ilə konsultasiya edildi. Baş beynin tomoqrafiyası zamanı işemik prosesin hər iki yarımkürəni əhatə etməsi üzə çıxdı. Cərrahi əməliyyat və ya onun xaricə aparılması variantları məqsədəuyğun sayılmadı”.
Professor qeyd edir ki, sabiq nazirdə tənəffüs pozuntuları qeyd edilir, həkimlər onun həyatı ilə çarpışırlar.
İsgəndər Həmidov 1948-ci ildə doğulub. İqtisadiyyat və hüquq sahələri üzrə iki ali təhsil alıb. Uzun illər daxili işlər orqanlarında xidmət edib. Milli azadlıq hərəkatının öncül şəxslərindəndir. 1990-cı ildən parlamentin üzvü olub. 1992-1993-cü illərdə Azərbaycanın daxili işlər naziri postunu tutub. 1995-2003-cü illərdə həbsdə yatıb.
