Bir dairənin 11 namizədi seçkinin rəsmi nəticəsini tanımır
9 fevral parlament seçkisində 30 saylı Suraxanı dairəsindən namizəd olan şəxslərin bir qrupu bəyanat yayıb.
Bəyanatı Müsavat Partiyasının üzvü Misir Mahmudov, Ümid Partiyasının üzvü İlahə Sadıqova, bitərəflər Fərid Eyvazov, Vüsalə Həsənova, Mahmud Mahmudov, Afiq İsrəfilov, Ziya Quliyev, Samirə Rəfullayeva, Fərid Salahlı, Mirkazım Seyidov, Rəfail Zeynalzadə imzalayıb.
Toplum.tv-nin məlumatına görə, namizədlər bildirirlər ki, 30 saylı dairədə seçkinin keçirilməsi və səsvermənin nəticələrinin müəyyənləşdirilməsi zamanı ciddi pozuntulara yol verilib: “Bunu nəzərə alaraq seçkinin rəsmi nəticələrini tanımadığımızı bəyan edir, 30 saylı Suraxanı seçki dairəsi üzrə səsvermənin nəticəsinin etibarsız sayılmasını və təkrar seçki keçirilməsini istəyirik”.
Mərkəzi Seçki Komissiyasının ilkin məlumatına görə, 30 saylı dairədə seçkini hakim Yeni Azərbaycan Partiyasının üzvü Sevinc Fətəliyeva udur.
Rəsmi məlumata görə, 125 dairə üzrə keçirilmiş parlament seçkisində prezident İlham Əliyevin sədrlik etdiyi Yeni Azərbaycan Partiyasından 72 nəfər deputat seçilir.
Lider namizədlər arasında Vətəndaş Həmrəyliyi Partiyasının 3, Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyasının hərəyə 1 təmsilçisi var, 42 nəfər isə partiyasızdır.
