Azərbaycan iki gəncə görə 72 min avro cərimələndi
Avropa İnsan Hüquqları Məhkəməsi azərbaycanlı fəallar Qiyas İbrahimov və Bayram Məmmədovun işi üzrə qərarını elan edib.
“Azadlıq” radiosunun məlumatına görə, qərar Qiyas İbrahimov və Bayram Məmmədovun tutularkən işgəncələrə məruz qalmaları və onların barəsində həbs qətimkan tədbirinin seçilməsi məsələləri ilə bağlıdır.
Məhkəmə gənc fəalların işgəncəyə məruz qalmamaq hüququnun, azadlıq və toxunulmazlıq hüququnun və başqa hüquqlarının pozulduğu qənaətinə gəlib.
Avropa Məhkəməsinin qərarına əsasən, Azərbaycan hökuməti müdafiə xərcləri ilə birgə Qiyasla Bayrama ümumilikdə 72 min avro təzminat ödəməlidir.
Bayram Məmmədov və Qiyas İbrahimov 2016-cı il mayın 10-dan həbsdə olublar. Həmin il Bakı Ağır Cinayətlər Məhkəməsi onları külli miqdarda narkotik vasitə saxlamaqda təqsirli bilərək 10 il müddətinə azadlıqdan məhrum edib. Sonradan Qiyas İbrahimovun cəzası 3 ay artırılıb.
Müdafiəçiləri onların həbsini siyasi sifariş sayıb. Onlar bildiriblər ki, 2016-cı il mayın 10-na keçən gecə mərhum prezident Heydər Əliyevin Bakının mərkəzindəki abidəsinə etiraz şüarları yazılıb, gənclər bu şüarlara görə tutulublar və işgəncəyə məruz qalıblar.
2019-cu il martın 17-də hər iki gənc prezidentin əfv sərəncamı ilə azadlığa buraxılıb.
