9 saylı dairədə 7 namizəd rəsmi nəticəni tanımır
Fevralın 9-da keçirilmiş parlament seçkisində 9 saylı Binəqədi dairəsindən namizəd olan şəxslərdən 7-si birgə bəyanatla çıxış edib. Arqument.az-ın məlumatına görə, bəyanatı Böyük Azərbaycan Partiyasının sədri Elşad Musayev, Müsavat Partiyası Divanının üzvü Nemət Kərimli, “Nida” Vətəndaş Hərəkatından Ülvi Həsənov, bitərəflər Günel Səfərova, Rəşad Rzayev, Əpoş Vəliyev və Elnur Qasımov imzalayıb.
Bəyanatda 9 saylı dairədə seçkinin total saxtakarlıq şəraitində keçirildiyi, seçicilərin iradəsinin nəzərə alınmadığı vurğulanır, səsvermənin rəsmi nəticələrinin ləğvi və yeni seçki keçirilməsi tələb olunur.
Mərkəzi Seçki Komissiyasının ilkin hesabatına əsasən, 9 saylı dairədə seçkini hakim Yeni Azərbaycan Partiyasının üzvü, deputat Kamaləddin Qafarov udur.
125 dairə üzrə keçirilmiş parlament seçkisində prezident İlham Əliyevin sədrlik etdiyi Yeni Azərbaycan Partiyasından 72 nəfər deputat seçilir. Lider namizədlər arasında Vətəndaş Həmrəyliyi Partiyasının 3, Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyasının hərəyə 1 təmsilçisi var, 42 nəfər isə partiyasızdır.
