Sənaye və ticarət göstəriciləri
Azərbaycanın sənaye sektoru 2020-ci ilin yanvar ayında 4,2 milyard manatlıq və ya 2019-cu ilin ilk ayı ilə müqayisədə 2,1 faiz çox məhsul istehsal edib. Novator.az-ın məlumatına görə, Dövlət Statistika Komitəsi bildirir ki, sənayenin qeyri neft-qaz sektorunda məhsul istehsalı 16,6 faiz artıb.
Başqa rəsmi açıqlamaya əsasən, yanvar ayında pərakəndə ticarət şəbəkəsində satılmış məhsulların dəyəri 3,1 milyard manata bərabər olub: “Ticarət dövriyyəsinin 1,6 milyard manatını ərzaq məhsulları, içkilər və tütün məmulatları, 1,5 milyard manatını qeyri-ərzaq məhsulları təşkil edib. Alıcıların son istehlak məqsədilə aldıqları mallara xərclədiyi vəsaitin 44,8 faizi ərzaq məhsullarının alınmasına sərf olunub”.
Əhalinin bir nəfərinə düşən orta pərakəndə ticarət dövriyyəsi 309,1 manat göstərilir.
Dövlət Statistika Komitəsi həmçinin qeyd edir ki, 2019-cu ildə Azərbaycanın hüquqi və fiziki şəxsləri dünyanın 195 ölkəsindəki tərəfdaşları ilə ticarət əməliyyatları həyata keçirib, 122 ölkəyə məhsul ixrac olunub, 185 ölkədən idxal qeydə alınıb: “2018-ci illə müqayisədə xarici ticarət dövriyyəsi faktiki qiymətlərlə 4,3 faiz artıb, real ifadədə 3,7 faiz, o cümlədən idxal 6,5 faiz, ixrac 2 faiz azalıb. İl ərzində ölkədən 1 milyard 954,4 milyon dollar dəyərində qeyri neft-qaz məhsulları ixrac edilib, bu da 2018-ci ilə nisbətən faktiki qiymətlərlə 13,9 faiz, real ifadədə 7,8 faiz çoxdur”.
