11 fevral aksiyası
Fevralın 9-da keçirilmiş parlament seçkisində ayrı-ayrı dairələrdən namizəd olmuş və onlara dəstək verən bir qrup fəal fevralın 11-i axşam Bakıda, Mərkəzi Seçki Komissiyasının binası qarşısında oturaq aksiya keçirib. Onlar “Saxtakarlığa son!” şüarı ilə parlament seçkisinin rəsmi nəticələrinə etiraz bildiriblər. Polis aksiyaya müdaxilə edib.
“Turan”ın məlumatına görə, tutulanlar gecə yarısı azad edilib. Xəsarət alanlar var. Müsavatçı Ərzulla Buludovun xəstəxanaya yerləşdirildiyi bildirilir.
Aksiyanın əsas təşəbbüsçüsü 1987-ci il təvəllüdlü Rəbiyyə Məmmədovadır. O, 9 fevral seçkisində 10 saylı Binəqədi dairəsindən namizəd olub. Həmin dairədə seçkini partiyasız namizəd Madər Musayev udur. İş adamı olan Madər Musayev 1995-ci ildən Milli Məclisin deputatıdır.
Daxili İşlər Nazirliyinin sözçüsü Ehsan Zahidov APA-ya bildirib ki, fevralın 11-i saat 18-dən başlayaraq bir qrup şəxs Mərkəzi Seçki Komissiyasının qarşısında razılaşdırılmamış aksiya keçirməyə cəhd göstərib, aksiya təxminən 2 saat dağıdılıb, polisə müqavimət göstərən bir nəfər saxlanıb.
Mərkəzi Seçki Komissiyasının ilkin məlumatına görə, 125 dairə üzrə keçirilmiş parlament seçkisində prezident İlham Əliyevin sədrlik etdiyi Yeni Azərbaycan Partiyasından 72 nəfər deputat seçilir.
Lider namizədlər arasında Vətəndaş Həmrəyliyi Partiyasının 3, Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Vəhdət Partiyası, Vətəndaş Birliyi Partiyası, Demokratik Maarifçilik Partiyasının hərəyə 1 təmsilçisi var, 42 nəfər isə partiyasızdır.
