Referendumun qrafiki bəlli oldu
Ermənistanın Mərkəzi Seçki Komissiyası aprelin 5-nə təyin olunmuş konstitusiya dəyişikliyi referendumunun qrafikini təsdiqləyib. Novator.az-ın məlumatına görə, təşviqatın fevralın 17-dən aprelin 3-dək keçirilməsinə qərar verilib.
Referenduma fevralın 6-da parlament qərar verib. Fevralın 9-da fərman imzalayan prezident Armen Sərkisyan referendumu aprelin 5-nə təyin edib.
Baş nazir Nikol Paşinyana dəstək verən “Mənim addımım” blokunun təşəbbüsü olan referendumda ölkənin ana qanununa Konstitusiya Məhkəməsinin tərkibinin buraxılması barədə dəyişiklik edilməsi planlaşdırılır. Yenilik reallaşsa, Konstitusiya Məhkəməsinin ana qanuna 2015-ci ildə edilmiş dəyişikliklərdən öncə təyin olunan 7 üzvünün, o cümlədən sədr Qrayr Tovmasyanın səlahiyyətlərinə xitam veriləcək.
Konstitusiya Məhkəməsi 9 hakimdən ibarətdir. Uzun müddətdir bu qurumla Ermənistan hökuməti arasında ziddiyyətlər yaşanır.
Nikol Paşinyan hakimiyyətə xalq inqilabı dalğasında gəlib. O, 2018-ci il mayın 8-dən baş nazirdir.
Böyük əksəriyyəti Nikol Paşinyanın Vətəndaş Sazişi Partiyasının üzvü olan “Mənim addımım” bloku 132 deputatdan ibarət parlamentdə 88 mandatla təmsil edilir.
