Dörd namizəd aksiya keçirib
9 fevral parlament seçkisində 33 saylı Xətai birinci seçki dairəsindən dörd namizəd səsvermənin rəsmi nəticəsinə etiraz aksiyası keçirib.
Aksiyada bu namizədlər iştirak ediblər: Müsavat Məclisinin sədri Nüşabə Sadıqlı, Ağ Partiya sədrinin müavini Əhəd Məmmədli, “D18” Hərəkatının sədri Ruslan İzzətli və siyasətçi, “Borçalı” Cəmiyyətinin sədri Zəlimxan Məmmədli.
Fevralın 11-də dairə seçki komissiyasının binası qarşısında keçirilən aksiyada namizədlər bildiriblər ki, səsvermə günü 33 saylı dairədə kütləvi qanunsuzluqlar törədilib və səsvermənin rəsmi nəticəsi reallığı əks etdirmədiyinə görə ləğv olunmalıdır.
Polis əməkdaşları namizədlərin aksiyasına müdaxilə edib. Əhəd Məmmədli və Ruslan İzzətli qısa müddətə saxlandıqdan sonra sərbəst buraxılıblar.
Mərkəzi Seçki Komissiyasının ilkin məlumatına görə, 33 saylı dairədə hakim Yeni Azərbaycan Partiyasının üzvü Hüseynbala Mirələmov liderlik edir.
