Yeni parlament seçkisi 2024-cü ilə düşür
Fevralın 9-da keçirilmiş növbədənkənar parlament seçkisinin ilkin nəticələri açıqlanıb. Mərkəzi Seçki Komissiyası 125 dairə üzrə rəsmi nəticələri fevralın 29-dək Konstitusiya Məhkəməsinə göndərməlidir. Yeni parlament Konstitusiya Məhkəməsinin təsdiqindən sonra formalaşmış sayılacaq.
Novator.az bildirir ki, konstitusiyaya görə, Milli Məclisin hər çağırışının səlahiyyət müddəti 5 ildir. Parlament seçkisi hər beş ildən bir noyabr ayının birinci bazar günü keçirilir.
1991-ci ildə müstəqilliyini bərpa etmiş Azərbaycanda 2020-ci ilədək beş parlament seçkisi olub: 1995-ci il noyabrın 12-də, 2000-ci il noyabrın 5-də, 2005-ci il noyabrın 6-da, 2010-cu il noyabrın 7-də, 2015-ci il noyabrın 1-də.
Altıncı parlament seçkisi 2020-ci il noyabrın 1-də keçirilməli idi. 2019-cu il dekabrın 5-də prezident İlham Əliyev Milli Məclisi buraxaraq 2020-ci il fevralın 9-na növbədənkənar parlament seçkisi təyin edib.
Ana qanuna əsasən, növbədənkənar seçkidə seçilən Milli Məclisin çağırışının səlahiyyət müddəti beş ildən az ola bilər. Bu halda növbəti parlament seçkisi növbədənkənar seçkidə seçilən Milli Məclisin çağırışının səlahiyyət müddətinin beşinci ilinin noyabr ayının birinci bazar günü keçirilir.
Novator.az qeyd edir ki, 2020-ci il fevralın 9-da seçilən parlamentin səlahiyyət müddətinin beşinci ili 2024-cü ilə təsadüf edir və həmin il noyabr ayının birinci bazar günü – noyabrın 3-də yeni parlament seçkisi olmalıdır.
