“Dübəndi” yenidən qurulub
Fevralın 10-da Bakının Pirallahı rayonunda “Azərenerji” Açıq Səhmdar Cəmiyyətinin yenidən qurulan 110/35/6 kilovoltluq “Dübəndi” yarımstansiyasının açılışı olub.
Açılışda iştirak edən prezident İlham Əliyev “Dübəndi”nin işçiləri ilə görüşü zamanı deyib ki, bu yarımstansiyanın əvvəlki vəziyyəti çox acınacaqlı idi, demək olar ki, sıradan çıxmışdı: “Ona görə yeni yarımstansiyanın tikintisi zəruri idi və bunu da “Azərenerji” yüksək səviyyədə təşkil edib. Beləliklə, Azərbaycan əhalisinin enerji ilə dayanıqlı təminatı işində növbəti önəmli addım atılıb”.
Dövlət başçısı bildirib ki, bu il Mingəçevir İstilik Elektrik Stansiyasında bərpa işləri davam etdiriləcək, ilin birinci yarısında stansiya tam gücü ilə işləyəcək.
AZƏRTAC xəbər verir ki, “Dübəndi” yarımstansiyanda yenidənqurma zamanı 63 MVA gücündə iki yeni transformator yerləşdirilməklə yarımstansiyanın gücü 126 MVA-ya çatdırılıb. Yarımstansiya Bakıətrafı kənd və qəsəbələrin çox hissəsini, Pirallahı Sənaye Parkı, qaçqın və məcburi köçkün şəhərciyi, kabel zavodu, “Zirə Ekopark” kompleksi və digər yerlərin enerji təchizatını təmin edəcək.
